Hindi maaaring basta-basta ibasura ng Senado ang impeachment complaint laban kay Vice President Sara Duterte nang hindi muna ito kumikilos bilang isang Impeachment Court, ayon kay incoming Senator at dating Justice Secretary Leila de Lima nitong Miyerkules, Hunyo 4.
“Only the Senate constituted as an Impeachment Court can decide matters of impeachment,” ani De Lima sa isang press conference sa Quezon City. “The Senate, acting regularly as a house of Congress, has no power to dismiss an impeachment case.”
Reaksiyon ito ni De Lima sa kumakalat na draft Senate resolution na layong harangin ang impeachment trial ni Duterte. Kinumpirma ni Senator Imee Marcos ang pag-iral ng naturang draft na bahagi raw ng mga “maraming bersyon” ng posibleng solusyon.
Kinumpirma rin ni senator-elect Panfilo Lacson na nakatanggap siya ng kopya ng draft resolution.
Ayon pa kay De Lima, kung papasa ang resolusyong ito ng Senado bilang regular na Kongreso at hindi bilang Impeachment Court, wala itong legal na bisa at maaari lamang balewalain ng ika-20 Kongreso.
“It has no legal effect and may be ignored by the 20th Congress Senate, whether acting as a house of Congress or as an impeachment court,” dagdag pa niya.
Sa ilalim ng Konstitusyon, giit ni De Lima, wala ni isang probisyon na nagsasabing maaaring ibasura ang isang impeachment complaint dahil sa hindi pagkilos ng Senado.
“The only option of the Senate is to hear and decide the complaint. Thus, dismissal of the complaint cannot be by operation of the Constitution, but in violation of the Constitution,” diin ni De Lima, na itatalaga ring bahagi ng prosekusyon.
Tinutulan din ni De Lima ang argumento sa draft resolution na nagsasabing dapat ibasura ang impeachment complaint dahil hindi agad ito naaksyunan ng Senado dahil sa timing ng transmittal.
“That is not inability but unwillingness,” ani De Lima. “The upper chamber cannot benefit from its own illegal action.”
Tinukoy rin sa draft resolution ang karapatan ni Duterte sa mabilis na paglilitis batay sa Article III, Section 16 ng Konstitusyon. Ngunit giit ni De Lima:
“The thrust of impeachment is accountability, not the rights of the impeached official.”
Ayon naman kay Lacson, maaaring kuwestiyunin sa Korte Suprema ang legalidad ng resolusyon kung ito’y tuluyang papasa.
“If the Supreme Court rules in favor of the petitioner, it can compel the Senate to continue with the impeachment trial,” pahayag ng senador-elect.
Noong Pebrero, inaprubahan ng House of Representatives ang impeachment complaint laban kay VP Duterte sa botong 215 na mambabatas, kaugnay ng umano’y abuso sa paggamit ng confidential at intelligence funds ng mga ahensiyang pinamumunuan niya. Siya ang unang bise presidente ng bansa na na-impeach ng Mababang Kapulungan.
Inaasahan sanang sisimulan ng Senado ang pagtalakay sa Articles of Impeachment noong Hunyo 2, ngunit ipinagpaliban ito ni Senate President Chiz Escudero sa Hunyo 11.
More Stories
Impeachment Hindi Dapat Ginagawang Opsyonal
Bigas Bagsak Presyo! P20 Kada Kilo Lumalawak na — PSA
UP Law Profs sa Senado: Impeachment ni VP Sara Ituloy