BUCOR LUMAGDA SA KASUNDUAN PARA SA PAGBIBIGAY NG TRABAHO SA EX-INMATES

PINIRMAHAN na ni Bureau of Corrections Director General Gregorio Pio Catapang Jr. ang kasunduan sa pagitan ng BP One Foods Inc. na naglalaan ng trabaho para sa mga bagong laya na Persons Deprived of Liberty (PDL).

Ayon kay Catapang, layon nitong maging maayos ang pagbabalik sa lipunan ng mga PDL at mabawasan ang tiyansa na bumalik sa dating gawi ang mga ito.

Binigyang-diin din ng naturang opisyal na ang kanilang pagpirma ni BP One Foods Inc. President Antonio Sebastian Escalante ay isa sa mga highlight ng selebrasyon ng BuCor para sa National Correctional Consciousness Week.

Layon naman ng BP One Foods Inc., na palawakin pa ang brand nito sa Metro at magbigay ng dekalidad na produkto habang nakakapagbigay ng competitive job opportunities at compensation.