BI, pinuri ang matagumpay na deportation ni Arnie Teves

Ikinagalak ng Bureau of Immigration (BI) ang matagumpay na deportation at pagbabalik sa bansa ni dating Negros Oriental Representative Arnolfo “Arnie” Teves Jr., na itinuturing na isang mahalagang tagumpay sa kampanya ni Pangulong Ferdinand Marcos Jr. para sa pananagutan at pagpapairal ng batas.

Dumating si Teves sa Pilipinas noong gabi ng Mayo 29 sakay ng Philippine Air Force aircraft, na nagpapakita ng matatag na koordinasyon ng iba’t ibang sangay ng pamahalaan upang maibalik sa bansa ang mga sangkot sa mabibigat na krimen at maiharap sila sa hustisya.

Ayon sa BI, ang pagbabalik ni Teves ay bunga ng maayos na ugnayan sa pagitan ng pamahalaan ng Pilipinas at ng Timor Leste, kung saan siya unang naaresto. Naging susi rin sa operasyon ang malapit na koordinasyon sa pagitan ng Department of Justice (DOJ), National Bureau of Investigation (NBI), Department of Foreign Affairs (DFA), at ang suporta ng Bureau of Immigration.

Si Teves ay nahaharap sa ilang kaso ng pagpaslang, kabilang na ang pamamaslang kay Negros Oriental Governor Roel Degamo noong Marso 4, 2023, gayundin sa iba pang umano’y marahas na gawain.

Pagdating niya sa bansa, si Teves ay nagpakita ng travel document, dahil kanselado na ang kanyang Philippine passport. Tiniyak ng isang kinatawan ng BI na nasunod ang lahat ng legal na proseso at mga umiiral na patakaran sa kanyang pagdating.

Ayon kay BI Commissioner Joel Anthony Viado, naninindigan ang kanilang ahensya sa pagpapatupad ng batas at suporta sa mga inter-agency efforts laban sa terorismo at transnational crimes.

“Matatag ang Bureau of Immigration sa pakikiisa sa DOJ at iba pang ahensiya ng seguridad upang tiyakin na walang sinuman ang makakatakas sa kamay ng hustisya, saan man sila magtago,” pahayag ni Viado.

“Ang operasyong ito ay sumasalamin sa ating panata sa Bagong Pilipinas—isang lipunang pinaghaharian ng hustisya, pananagutan, at matibay na paggalang sa batas,” dagdag pa niya.

Ang pagbabalik ni Teves ay ikinokonsiderang isa sa pinakamalaking hakbang ng administrasyon upang papanagutin ang mga sangkot sa karahasan, anuman ang kanilang posisyon o impluwensiya.