BARIKADA NG KOJC MEMBERS BINUWAG NG PNP; 18 ARESTADO

MATAPOS ang ilang oras na pagbabarikada sa Carlos P. Garcia Highway, Catitipan, Davao City ng mga tagasuporta ng wanted na mangangaral na si Pastor Apollo C. Quiboloy malapit sa Kingdom of Jesus Christ (KOJC) compound ay tuluyan na itong binuwag ng pulisya bandang alas-3:00 nitong hapon, Agosto 26, 2024.

Naglunsad ng prayer rally ang mga tagasuporta ni Quiboloy noong Linggo ng gabi, Agosto 25, ngunit nanatili sila hanggang Lunes ng umaga at hindi umalis sa lugar at hinarang ang highway gamit ang kanilang mga sasakyan.

Dahil dito, maraming sasakyan ang hindi na nakakadaan sa highway, na siyang dahilan ng pagkadismaya ng mga biyahero at motorista sapagkat kailangan nilang dumaan sa mahabang alternatibong ruta para makarating sa gitna ng lungsod o mula sa downtown area hanggang sa hilagang bahagi.

Gayunpaman, matapos abisuhan ng mga pulis na lisanin ang lugar, tuluyan na silang itinaboy sa gilid ng highway at sa gate ng KOJC compound.

Binaklas din ng pulisya ang ginawang entablado o istraktura ng mga tagasuporta na ginamit sa prayer rally upang hindi na ito magamit.

Ayon sa PNP, mayroong 18 miyembro ng KOJC ang naaresto nang buwagin ang barikada matapos umanong tumanggi na umalis sa lugar o “obstruction of justice.”

Gayunpaman, patuloy na binantayan ng mga pulis ang highway upang matiyak na walang miyembro ng KOJC na makapasok sa kanilang compound.

Matatandaan na pinayuhan ng City Transport and Traffic Management Office (CTTMO) ang mga driver ng mga trak, bus, at iba pang sasakyang bumibiyahe sa Carlos P. Garcia Highway na humanap ng alternatibong ruta dahil sa patuloy na tensyon sa pagitan ng mga miyembro ng KOJC at pulisya sa ang lugar.

Umabot sa 2,000 pulis mula sa iba’t ibang regional police office sa Mindanao ang idineploy sa KOJC compound noong Agosto 24 para arestuhin ang mangangaral at pinuno at ang mga kasamahan nitong akusado sa mga kasong kinakaharap nila.