BAGONG HALAL NA MGA KONSEHAL NG DAVAO, HAHARAP SA HAMON NG PAMUMUNO AT MGA SULIRANIN NG LUNGSOD

DAVAO CITY — Buong-buo ang kontrol ng Hugpong sa Tawong Lungsod, partido ng pamilya Duterte, sa ika-21 Sangguniang Panlungsod ng Davao matapos mailuklok ang 24 na konsehal, kabilang ang mga beterano, baguhan, at miyembro ng mga kilalang political dynasty.

Sa pinakabagong komposisyon ng konseho, walo mula sa bawat distrito ang nahalal, kung saan apat ang mga bagong mukha sa politika: Rodrigo “Rigo” Duterte II, Ragde Ibuyan, Doce Apostol, at Jopet Baluran — pawang may dugong pulitiko. Si Rigo ay apo ng dating Pangulong Rodrigo Duterte at anak ni Congressman Paolo Duterte, habang sina Ibuyan, Apostol, at Baluran ay mula rin sa pamilya ng mga dati nang konsehal ng lungsod.

Bumalik din sa serbisyo ang anim na dati nang konsehal na nagbakasyon matapos ang kanilang ikatlong termino: sina Pamela Librado-Morata, Ralph Abella, Danilo Dayanghirang, Atty. Nonong Cabling, Atty. Petite Principe, at Prosecutor Rachel Zozobrado.Sa nalalapit na panunumpa sa Hunyo 30, usap-usapan na kung sino ang mamumuno sa mga pangunahing komite sa konseho.

Pinag-aaralang muli ni Councilor-elect Danilo Dayanghirang na pamunuan ang Committee on Finance, Ways and Means, and Appropriations — isang makapangyarihang komiteng responsable sa pagpasa ng ₱14-bilyong pondo ng lungsod. Sa ngayon, si reelected Councilor Myrna Dalodo-Ortiz ang chair ng nasabing komite.

Nais namang bumalik ni Pamela Librado-Morata sa Labor and Employment Opportunities Committee, na dating hawak niya at ngayon ay nasa pamamahala ni Councilor Bai Cassandra Advincula. Kilala si Librado sa pagtataguyod ng karapatan ng mga delivery rider at manggagawa.

Dalawa sa mga bagong halal — sina Ralph Abella at Doce Apostol — ang nagpahayag ng interes na mamuno sa Social Services Committee. Si Abella ay may karanasan bilang konsehal ng ika-19 na konseho, habang si Apostol ay galing sa barangay level at kapatid ng outgoing Councilor Dante Apostol.

Samantala, naging sentro rin ng atensyon ang Environment and Natural Resources Committee na pinamunuan ng broadcaster-turned-councilor na si Tek Ocampo. Kasama sa mga kontrobersiyang hinarap ng kanyang komite ang waste-to-energy project at mga isyu sa watershed protection at urban tree-cutting.

Hindi rin nawawala sa diskusyon kung ililipat sa mga anak ang dating hawak na komite ng kanilang mga ama — gaya nina Ibuyan at Baluran na maaaring italaga sa Public Works, Transportation, o Government Enterprises committees.

Dahil sa pagkaka-detain ng mayor-elect na si dating Pangulo Rodrigo Duterte sa International Criminal Court (ICC), inaasahang si Vice Mayor-elect Sebastian “Baste” Duterte ang magiging OIC Mayor ng lungsod.

Kapag nangyari ito, si Rigo Duterte II — na may pinakamaraming boto sa hanay ng mga konsehal (192,324 votes) — ang posibleng maupong OIC Vice Mayor, ayon sa Commission on Elections-Davao. Ang pinal na desisyon ay nakasalalay sa Department of the Interior and Local Government (DILG).

Sa edad na 27, si Rigo ay magiging pinakabatang OIC Vice Mayor ng lungsod, kung maitatakda. Sa kanyang panayam matapos ang proklamasyon, sinabi niyang susundan niya ang yapak ng kanyang ama, dating Vice Mayor Paolo Duterte.

Habang pinaghahandaan ng bagong konseho ang kanilang mga tungkulin, nananatili ang mga pangunahing suliraning kailangang tugunan: matinding trapiko, problema sa baha, kakulangan sa trabaho, at mga serbisyong panlipunan.

Bilang tagapasa ng mahahalagang ordinansa at badyet para sa lungsod, malaking papel ang gagampanan ng 21st City Council sa direksyong tatahakin ng Davao sa mga susunod na taon. Subalit sa ilalim ng dominasyon ng isang partidong kontrolado ng iilang pamilya, umaasa ang publiko na ang kapangyarihan ay gagamitin para sa tunay na serbisyo, hindi para sa pagpapatuloy ng dinastiyang pulitikal.