Lalong uminit ang tensyong pulitikal sa bansa matapos pormal na ihain ngayong Lunes, Pebrero 9, 2026, ang ikatlong impeachment complaint laban kay Vice President Sara Duterte sa Kamara.
Ang 98-pahinang dokumento ay isinumite sa tanggapan ni House Secretary General Cheloy Garafil ng isang grupo ng mga alagad ng simbahan at mga abogado mula sa Integrated Bar of the Philippines sa pangunguna ni Atty. Armando Ligutan, habang pormal naman itong inendorso ni Mamamayang Liberal Party-list Representative Leila de Lima.
Nakapaloob sa reklamong ito ang mabibigat na akusasyon kabilang ang hayagang paglabag sa Konstitusyon, pagtataksil sa tiwala ng publiko, at iba pang matitinding krimen.
Pangunahin sa mga alegasyon ang umano’y maanomalyang paggamit at paglilipat ng mahigit 500 milyong pisong confidential funds ng Office of the Vice President mula 2022 hanggang 2023, gayundin ang 112.5 milyong pisong pondo mula sa Department of Education noong siya pa ang kalihim nito.
Bukod sa usaping pondo, isinama rin sa reklamo ang kontrobersyal na banta ng asasinasyon laban kay Pangulong Ferdinand Marcos Jr., sa First Lady, at sa dating House Speaker, pati na ang mga paratang ng sedisyon, panunuhol sa mga opisyal ng DepEd, at hindi tamang pagdedeklara ng ari-arian sa kanyang SALN.
Ang hakbang na ito ay naganap sa gitna ng matatalas na pahayag ni Senator Risa Hontiveros, na naunang nagsabi na kayang talunin o “i-slay” ng isang nagkakaisang oposisyon ang kandidatura ni Duterte sa 2028.
Gayunpaman, nagbabala si dating Senate President Franklin Drilon na maaaring hindi umusad ang paglilitis sa Senado kung magkakaroon ng pagbabago sa liderato nito.
Ayon kay Drilon, tanging sa ilalim ng pamumuno ni Senate President Tito Sotto garantisadong diringgin ang kaso, dahil ang anumang tangkang palitan ang kasalukuyang liderato ay malinaw na indikasyon ng pagmamaniobra para sa susunod na eleksyon.
Sa kabila ng mga reklamong ito, nananatiling matigas ang paninindigan ng kampo ng Bise Presidente na ang mga ito ay bahagi lamang ng isang “political witch hunt” at destabilisasyon upang gipitin siya bago ang 2028 presidential race.
Dahil tapos na ang “one-year bar rule” na nagpahinto sa impeachment noong nakaraang taon, inaasahang magiging mabilis ang diskusyon sa House Committee on Justice sa mga darating na linggo.
About the Author
