Nagkaisa ang anim na pangunahing grupo ng negosyante sa bansa sa pagsuporta sa mga hakbang para isulong ang transparency, accountability, at reporma sa pamahalaan, kabilang na ang panukalang amyenda sa Bank Secrecy Law at Foreign Currency Deposit Act.
Sa isang magkasanib na pahayag nitong Biyernes, Oktubre 17, nagpahayag ng suporta ang Filipina CEO Circle (FCC), Financial Executives Institute of the Philippines (FINEX), Institute of Corporate Directors (ICD), Justice Reform Initiative (JRI), Management Association of the Philippines (MAP), at Makati Business Club (MBC) sa mga repormang layong palakasin ang kakayahan ng mga regulator na imbestigahan ang korapsyon at money laundering.
Ayon sa mga grupo, ang kasalukuyang mga batas ay nagsisilbing “straitjacket” o tali para sa mga imbestigador, na naglilimita sa kakayahan nilang tugisin ang mga sangkot sa katiwalian at iligal na gawain. Idinagdag pa nila na ang mga restriksiyong ito ay nakaapekto sa katatagan ng pananalapi at ekonomiya ng bansa.
Sa panukalang amyenda, bibigyan ng kapangyarihan ang Bangko Sentral ng Pilipinas (BSP) na silipin ang mga deposito kapag may matibay na dahilan ang Monetary Board na maniwalang may kinalaman sa pandaraya ang mga opisyal ng bangko o sinumang konektado sa mga institusyong pinangangasiwaan ng BSP.
“Sa pamamagitan ng pagbibigay ng awtoridad sa mga regulator na magsiyasat ng korapsyon, tax evasion, at iba pang iligal na aktibidad, mapapangalagaan ang integridad ng pampubliko at pribadong sektor,” ayon sa pahayag.
Sa isang blog post, tatlong opisyal ng BSP na sina Deputy Governor Mamerto Tangonan, Assistant Governor Maria Margarita Debuque-Gonzales, at Currency Policy and Integrity Head Eloisa Glindro, ang nanawagan din ng pagluwag sa bank secrecy laws bilang mas epektibong hakbang laban sa korapsyon.
“Ang mas bukas na sistema ng bank secrecy, na may tamang safeguards, ay makatutulong para masundan ang daloy ng maruruming pera, mapatunayang tama ang mga deklarasyon ng yaman, at makapagsampa ng mga kasong mapapatunayan sa korte,” ayon sa mga opisyal.
Binigyang-diin din ng BSP na ang mungkahing demonetization o pagpapalit ng P1,000 at P500 bills ay isang “blunt at high-cost instrument” laban sa korapsyon, hindi tulad ng transparency reforms na direktang tumatarget sa ugat ng problema.
Ang pahayag ay kasunod ng panawagan ni dating Finance Secretary Cesar Purisima na tanggalin sa sirkulasyon ang P1,000 at P500 bills matapos kumalat ang alegasyon na ginamit umano ang mga ito sa paghahatid ng bilyon-bilyong pisong pondo sa mga bahay nina Leyte Rep. Martin Romualdez at dating Ako Bicol Rep. Zaldy Co.
Bilang karagdagang hakbang laban sa katiwalian, iminungkahi rin ng BSP ang digitalization ng mga bayarin sa gobyerno, mas mahigpit na pagpapatupad ng anti-money laundering at anti-terrorism financing laws, at pagpapalawak ng financial inclusion upang mabawasan ang paggamit ng pisikal na pera.
Samantala, nagpahayag din ng suporta ang mga business group sa desisyon ni Ombudsman Jesus Crispin “Boying” Remulla na ibalik ang pampublikong akses sa Statements of Assets, Liabilities, and Net Worth (SALN) ng mga opisyal ng gobyerno.
Ayon sa kanila, ang pagbabalik ng akses ay magpapatibay sa prinsipyo ng accountability na nakasaad sa Konstitusyon at makatutulong upang maibalik ang tiwala ng mamamayan sa mga institusyon ng pamahalaan.
“Kapag bukas at predictable ang sistema ng pamamahala, nababawasan ang panganib ng korapsyon at policy uncertainty. Ito’y nagdudulot ng mas mababang gastos sa negosyo, mas matatag na kumpetisyon, at tuloy-tuloy na paglago ng ekonomiya,” ayon sa kanilang pahayag. (LIMUEL TOLENTINO)
About the Author
