Marcos Hinikayat na Bumuo ng Education Cabinet Cluster

MANILA — Magkasanib na ipinasa ng Senado at House of Representatives ang isang concurrent resolution na humihimok kay Pangulong Ferdinand “Bongbong” Marcos Jr. na bumuo ng Cabinet Cluster para sa Edukasyon bilang tugon sa patuloy na krisis sa edukasyon sa bansa, ayon sa Second Congressional Commission on Education (EDCOM 2) nitong Sabado, Hunyo 14.

Sa pahayag ng EDCOM 2, inaprubahan ang nasabing resolusyon noong Hunyo 11, huling araw ng 19th Congress, matapos na matukoy sa Year 1 at 2 reports ng komisyon ang matitinding problema sa functional illiteracy, kakulangan sa early childhood education, job-skills mismatch sa mga nagtapos, at kakulangan sa teacher development.

Pinangunahan nina Senator Win Gatchalian at Rep. Roman Romulo ng Pasig, kapwa co-chairperson ng EDCOM 2, ang pagsusulong ng resolusyon na umani ng suporta mula sa parehong kapulungan ng Kongreso. Anila, “landmark consensus” ito na layong palakasin ang koordinasyon sa pagitan ng mga ahensyang pang-edukasyon.

“Karamihan ng mga suliraning iniulat ng EDCOM2 — tulad ng krisis sa functional literacy, problema sa senior high school, kakulangan sa kaalaman ng mga guro, at hindi tugmang skills ng mga graduates — ay dahil sa kawalan ng maayos na ugnayan ng mga education agencies,” ani Romulo.

Dagdag pa niya, ang Cabinet Cluster for Education ay magsisilbing mataas na plataporma upang mapalalim ang pagtutulungan ng mga ahensya, sa ilalim ng direktang pamumuno ng Pangulo.

Ang panukalang cluster ay nakaangkla sa direktiba ni Pangulong Marcos noong Agosto 2024, kung saan inatasan niya ang mga education agencies na bumuo ng komprehensibong 10-year education and workforce development strategy.

“Sa gitna ng patuloy na job-skills mismatch, mababang resulta sa senior high school, at learning crisis na binigyang-diin ng EDCOM 2, napakahalaga ng isang mataas at organisadong diskarte upang matulungan ang ating mga mag-aaral,” ani EDCOM 2 Commissioner Rep. Pablo John Garcia. “Ang cluster na ito ang magsisilbing gabay tungo sa mas pinagtibay na koordinasyon at malinaw na direksiyon.”

Ayon sa EDCOM 2, suportado ng iba’t ibang ahensiya ng gobyerno, edukasyon stakeholders, at eksperto ang panukala, na layong isulong ang mas maigting na ugnayan at tamang alokasyon ng pondo tungo sa mga prayoridad na layunin para sa bansa.

Suportado rin ito ng mga EDCOM 2 commissioner na sina Senators Sherwin Gatchalian, Alan Peter Cayetano, Joel Villanueva, at Loren Legarda. Sina Senators Pia Cayetano at Risa Hontiveros naman ay nagsabing matagal nang huli ang pagkakaroon ng ganitong body para mapabuti ang kalidad ng edukasyon sa bansa.

“Panahon na para ang edukasyon ay hindi lamang gawan ng polisiya kundi bigyan ng buong pansin sa antas ng Gabinete,” ani Gatchalian.