₱200 DAGDAG-SAHOD LUSOT SA KAMARA

Isang panalo para sa mga manggagawa ang naipasa ng House of Representatives ngayong Miyerkules, Hunyo 4, matapos aprubahan sa ikatlo at pinal na pagbasa ang panukalang batas na magbibigay ng ₱200 dagdag sahod kada araw para sa mga minimum wage earners sa pribadong sektor.

Sa botong 171 pabor, 1 tutol, at 0 abstention, binigyang-daan ng Kamara ang matagal nang isinusulong ng sektor ng paggawa na legislated wage hike—ang una mula pa noong 1989.

Ngunit may balakid pa: ang bersyon ng Senado, na naipasa pa noong Pebrero 2024, ay nagtatakda lamang ng ₱100 dagdag sahod. Kailangang pagkaisahan ng bicameral conference committee ang magiging final amount bago maipadala sa Malacañang.

“We are way past the stage of whether we will pass a legislated wage hike. Ang tanong na lang: magkano? At para sa mga manggagawa, malinaw ang sagot — mas mataas, mas mabuti,” giit ni House Deputy Speaker Raymond Mendoza, kinatawan ng Trade Union Congress of the Philippines (TUCP).

Kung mapipirmahan ni Pangulong Ferdinand Marcos Jr., ito ang magiging kauna-unahang legislated wage hike sa loob ng 36 taon.

Iba’t ibang mambabatas ang nagpahayag ng suporta matapos ang botohan. Ayon kay Tingog Party-list Rep. Jude Acidre, hindi makatarungan na tumataas ang presyo ng bilihin ngunit nananatiling mababa ang sahod.

“This P200 wage increase is not just about numbers. It’s about dignity,” ani Acidre. “Kung nagtatrabaho ka nang maayos, dapat kaya mong pakainin ang pamilya mo at pag-aralin ang anak mo.”

Sina Gabriela Rep. Arlene Brosas at Kabataan Party-list, bagama’t bumoto ng “yes,” ay may reservations, dahil isinusulong nila ang mas mataas na ₱750 dagdag sahod.

“Bagamat kapos ang ₱200 na umento, ito ay signipikanteng hakbang para muling mailagay sa sentro ng talakayan ang usapin ng nakabubuhay na sahod,” ani Brosas.

Pinagdebatehan nang matindi ang panukala, dahil ayon sa mga negosyante—lalo na ang micro, small, and medium enterprises (MSMEs)—maaaring hindi nila kayanin ang dagdag gastos. Isa sa mga mungkahi ay magbigay ng subsidiya ang gobyerno sa mga maliliit na negosyo.

“Kung tataasan natin ang sahod, lalaki ang kita ng mga manggagawa, tataas ang konsumo, at sisigla ang ekonomiya,” dagdag ni Acidre.

Hindi pa rin naglalabas ng malinaw na posisyon si Pangulong Marcos ukol sa panukala. Noong Labor Day 2024, imbes na aprubahan ang hiling ng mga grupo, inatasan niya ang mga regional wage boards na magsagawa ng review — hakbang na tinutuligsa ng labor groups bilang “kulang at mabagal.”

Ayon sa IBON Foundation, ang family living wage sa Metro Manila ay nasa ₱1,222 kada araw, malayo sa kasalukuyang ₱645 na minimum wage.

“Oras na para wakasan ang dekada ng legislative inaction sa sahod,” giit ng labor groups. “Hindi pwedeng puro diskusyon habang naghihirap ang mga manggagawa.”