Sen. Lito Lapid, tanging dumalo sa Alyansa Thanksgiving Party

Mandaluyong City — Sa kabila ng tagumpay ng ilang kandidato ng Alyansa sa nakaraang halalan, tanging si Senador Lito Lapid lamang ang dumalo sa isinagawang post-election thanksgiving party ng administrasyon nitong Sabado, na ginanap sa Alyansa headquarters sa Mandaluyong City.

Ang nasabing pagtitipon ay isinagawa ilang oras matapos ideklara ng Commission on Elections ang labindalawang nanalong senador para sa bagong termino.

Si Lapid, na kumandidato sa ilalim ng Nationalist People’s Coalition (NPC), ay nagtamo ng mahigit 13.3 milyong boto, na nagtulak sa kanya sa ika-10 puwesto sa senatorial race. Ito na ang kanyang ika-apat na termino bilang senador.

“Maraming maraming salamat sa inyong tulong. Mabuhay kayong lahat,” ani Lapid sa kanyang maikling mensahe sa kampanya ng Alyansa.

Kapansin-pansin ang hindi pagdalo ng iba pang Alyansa candidates na nagwagi rin sa eleksyon, kabilang sina Senators-elect Pia Cayetano, Camille Villar, Tito Sotto, Panfilo Lacson, at Erwin Tulfo.

Gayunpaman, dumaan si Pangulong Ferdinand Marcos Jr. upang personal na pasalamatan ang buong kampanya. Bagama’t aminadong dismayado sa hindi pagkapanalo ng lahat ng Alyansa candidates, nanawagan siya ng pagkakaisa.

“I wish we had better results but we live to fight another day. It’s time to put politics aside,” ani Marcos.

Naging tampok din sa kasayahan ang mga inihandang inuming may kakaibang tema, kabilang ang mga cocktail na pinangalanan sa mga kandidato ng Alyansa gaya ng “The Ping Martini,” “Pia Pia Pia Colada,” “Blue Supremo,” “Mojito Sotto,” at “Benhur-ricane.”

Bagama’t kulang sa presensiya ng iba pang panalo, tuloy ang pasasalamat ng Alyansa sa mga sumuporta sa kanilang kampanya at panawagan ng pagkakaisa matapos ang matinding laban sa eleksyon.