Walang ‘bloodbath’ sa impeachment trial ni VP Sara Duterte — Leila De Lima

MANILA — Nilinaw ni incoming party-list representative Leila De Lima noong Linggo na walang mangyayaring “bloodbath” sa nalalapit na impeachment trial ni Vice President Sara Duterte sa ika-20 Kongreso.

Ito ay tugon sa pahayag ni Duterte na inaabangan niya ang impeachment trial dahil gusto umano niya ng “bloodbath.”

Ayon kay De Lima, sa isang impeachment trial, ang tanging sinusubok ay ang taong in-impeach, kaya’t walang lugar para sa anumang marahas na eksena.

“Kung may dugo man na matulo, iyon ay dugo lamang ng taong in-impeach, hindi ng mga prosecutor, senador-hukom, administrasyon, o ng mga tao. Sisiguraduhin namin iyon,” ani De Lima.

Dinagdag pa niya na kilala ang kampo ni Duterte sa “palabis, walang kwentang kapalaluan, nakalalason na pananalita, at karahasan.”

“Laging malugod na tinatanggap si VP Sara na masaksihan kung paano magiging seryoso ang kaniyang paglilitis kung saan iginagalang ang kaniyang mga karapatan at patas ang daloy ng proseso, malayo sa gulo at drama na gusto niyang ipagawa sa kaniyang defense team,” sabi ni De Lima.

Binigyang-diin din niya na ang impeachment trial ay isang sagrado at legal na proseso para sa pananagutan, hindi isang palabas ng lakas o eksena.

“Walang puwang para sa gulo, drama, o teatro na hiniling ni Sara na ipagawa sa kanyang defense team. May contempt of court na naghihintay sa kanila kung susubukan nilang gawin iyon,” dagdag niya.

Nakaiskedyul na magsimula ang impeachment trial ni Duterte sa Hulyo 30.

Noong Pebrero, na-impeach si Duterte ng House of Representatives dahil sa mga isyu tulad ng paggamit ng confidential funds, diumano’y pagkakasangkot sa extrajudicial killings sa Davao City, at ang pag-amin niya na nagkaroon siya ng taong inutusan na patayin si Pangulong Ferdinand “Bongbong” Marcos Jr. kung siya ay papatayin.