SAN JUANICO BRIDGE, NILIMITAHAN ANG BIGAT NG MGA SASAKYAN DAHIL SA PINSALANG ESTRUKTURAL

Dahil sa natuklasang mga kahinaan sa estruktura ng San Juanico Bridge, ang iconic na tulay na nag-uugnay sa Leyte at Samar, agad na nagpatupad ng mahigpit na restriksyon ang pamahalaan upang matiyak ang kaligtasan ng publiko.

Noong Mayo 8, 2025, naglabas ang Department of Public Works and Highways (DPWH) ng memorandum na nagtatakda ng pansamantalang axle load limit na tatlong tonelada para sa lahat ng sasakyang tatawid sa tulay. Layunin nitong maiwasan ang lalong pagkasira ng tulay at maprotektahan ang mga biyahero at komunidad sa paligid.

Ayon kay Undersecretary Ariel F. Nepomuceno ng Office of Civil Defense (OCD), agad silang nagpadala ng mga tauhan upang beripikahin ang kalagayan ng tulay at makipag-ugnayan sa DPWH. “Ang pangunahing layunin namin ay masiguro ang kaligtasan ng publiko at maiwasan ang anumang trahedya,” ani Nepomuceno.

Binigyang-diin din niya na iniutos mismo ni Pangulong Ferdinand R. Marcos Jr. ang mahigpit na pagpapatupad ng weight limit at paggamit ng mga Roll-On/Roll-Off (RORO) vessels bilang alternatibong ruta — gaya ng Catbalogan-Tacloban at Calbayog-Tacloban — upang mapanatili ang konektividad habang inaayos ang tulay.

Bunga ng assessment, pinagbawal na ang mga sasakyang mabigat gaya ng mga bus at cargo trucks. Tanging mga sasakyang may bigat na hindi lalagpas sa 3 tonelada lamang ang pinapayagang tumawid, at kailangang dumaan sa gitnang bahagi ng tulay, isa-isa lamang, alinsunod sa direktiba ng traffic management personnel.

Naglabas ng Memorandum No. 05-005, s. 2025 ang Regional Disaster Risk Reduction and Management Council (RDRRMC) para sa pagpapatibay ng enforcement at koordinasyon sa LGUs. Kasunod nito, inilabas din ang Memorandum No. 05-006, s. 2025, na nagtatakda ng mga karagdagang panuntunan sa mga lalawigan ng Southern Leyte, Eastern Samar, Northern Samar, Ormoc City, at Tacloban City.

Isang joint task force mula sa DPWH, Philippine National Police (PNP), at Armed Forces of the Philippines (AFP) ang itinalaga sa paligid ng tulay upang magsagawa ng weighing checkpoints, traffic enforcement, at inspeksyon. Mahigpit na binabantayan ang mga sasakyang lumalabag upang maiwasan ang overload at mapanatili ang kaayusan sa trapiko.

Patuloy na minomonitor ng mga ahensya ng gobyerno ang kalagayan ng tulay habang pinag-aaralan ang mga pangmatagalang solusyon upang maibalik ang buong kapasidad nito.

“Layunin naming maiwasan ang sakuna at matiyak na matibay ang ating mga imprastruktura sa harap ng mga natural na panganib,” ani Nepomuceno, kasabay ng pagsunod sa direktiba ni Defense Secretary Gilberto C. Teodoro Jr.

Nagpaalala ang pamahalaan sa mga residente at biyahero na manatiling updated sa mga opisyal na anunsyo at sundin ang itinakdang mga panuntunan para sa kanilang kaligtasan.

“Ang Bagong Pilipinas ay isang ligtas at matatag na Pilipinas — at ang pag-aalaga sa San Juanico Bridge ay bahagi ng ating pambansang tungkulin,” pagtatapos ni Nepomuceno.