“Fake News Alert: DOF, Itinangging Magkakaroon ng Karagdagang Buwis”

Mariing itinanggi ng Department of Finance (DOF) ang kumakalat na ulat na umano’y magpapatupad ng bagong buwis ang gobyerno, kasabay ng pagtitiyak na wala itong planong mangolekta ng karagdagang buwis sa ngayon dahil sa matatag na kalagayan ng pananalapi ng bansa.

Ayon kay Finance Secretary Ralph Recto, maayos ang pamamahala ng gobyerno sa pondo ng bayan at sapat ang kasalukuyang kita upang matugunan ang mga pangangailangan ng mamamayan — nang hindi na kailangang magdagdag ng buwis.

“Hindi natin kailangan ng bagong revenue measures ngayon. Sa halip, ang kasalukuyang koleksyon ay sapat para pondohan ang mga programa ng gobyerno,” ayon kay Recto nitong Martes.

Ipinagmalaki rin ng kalihim ang malakas na double-digit growth ng koleksyon ng buwis sa unang quarter ng 2025, na aniya’y patunay ng matibay na kalagayan ng pananalapi ng bansa.

Batay sa datos ng DOF, umabot sa PHP 931.5 bilyon ang kabuuang buwis na nakolekta sa unang tatlong buwan ng taon — mas mataas ng 13.55% kumpara noong nakaraang taon. Pinangunahan ito ng Bureau of Internal Revenue (BIR) na kumolekta ng PHP 690.4 bilyon (+16.67%), habang umabot naman sa PHP 231.4 bilyon ang nalikom ng Bureau of Customs (BOC) (+5.72%).

Ani Recto, ang paglago ng kita ay dahil sa pinalakas na tax administration, digitalization, at enforcement efforts ng mga ahensyang panlikom.

“Ang kita natin ay sapat na para pondohan ang ating mga obligasyon, mga pangunahing programa, at sa patuloy na pagpapalago ng ekonomiya — nang hindi binibigatan ang ating mga kababayan,” dagdag pa ng kalihim.

Tiniyak rin ni Recto na kontrolado ang antas ng deficit ng bansa at nasa tamang direksyon ang pambansang utang alinsunod sa Medium-Term Fiscal Framework (MTFF).

Kaugnay nito, patuloy umanong isusulong ng DOF ang mga reporma tulad ng CREATE MORE Act, Ease of Paying Taxes (EOPT), mga amyenda sa batas ng Foreign Investments, Retail Trade Liberalization, at Public Service Act, maging ang pagpapatibay ng Public-Private Partnership (PPP) Code.

Bukod pa rito, sinabi ng DOF na patuloy nilang palalakasin ang mga non-tax revenue sources upang matugunan ang mga target sa Budget of Expenditures and Sources of Financing (BESF).

Sa gitna ng papalapit na halalan, nagbabala rin si Secretary Recto sa publiko laban sa disinformation, lalo na sa usapin ng buwis.

“Sa panahon ng eleksyon, madalas lumalaganap ang maling impormasyon lalo na sa social media. Hinihikayat natin ang publiko na maging mapanuri at umasa lamang sa mga opisyal na pahayag ng gobyerno,” aniya.

Sa huli, tiniyak ni Recto na nananatiling nakatuon ang gobyerno sa balanseng pag-unlad at pananalaping matatag — nang hindi sinasaktan ang bulsa ng mamamayan.