MANILA — Isang malaking karangalan ang inani ng Filipina lawyer na si Jessica Agra matapos mapasama sa Top 200 rankings ng International Padel Federation (FIP) ngayong linggo, bitbit ang 63 ranking points.
Si Agra ay isa lamang sa tatlong manlalaro mula sa Asya na nasa elite listahan—kasama sina Kotomi Ozawa ng Japan (No. 181) at Fatma Al Nabhani ng Oman (No. 199).
“Noong matapos ang 2024, sinabi ko sa sarili ko na sana sa dulo ng 2025 ay makapasok ako sa Top 200. Kaya sobrang saya ko at proud ako na naabot ko ito mas maaga pa sa target,” ani Agra sa isang panayam nitong Huwebes.
“Mas lalo akong na-inspire ngayon na magpursige pa. Pangarap ko talagang makalaro sa Premier Padel, at sa pagkakapasok ko sa Top 200, parang mas posible na ito ngayon,” dagdag niya.
Kabilang si Agra sa mga atleta ng Philippine Padel Association (PPA) na pinamumunuan ni Alenna Dawn Magpantay.
Ang tagumpay ni Agra ay resulta ng kanyang serye ng mga torneo noong nakaraang taon: gaya ng FIP Promotion Dubai (Round of 16), FIP Rise Manila (Quarterfinals), at FIP Rise Abu Dhabi (Round of 16).
Ngayong 2025, nagmarka siya ng mga quarterfinal finishes sa FIP Silver Melbourne (Enero), FIP Bronze Hong Kong at Manila (Marso), at FIP Silver Dubai (Abril). Pinakabago sa kanyang record ang semifinal finish sa FIP Bronze Kuala Lumpur ngayong buwan.
Biyahe muli si Agra ngayong Biyernes, patungong Hong Kong para sa FIP Bronze HK Leg 2 kasama ang kanyang bagong partner na si Alena Vasileva ng Russia.
Bago ang pagpasok sa padel, si Agra ay isang top junior tennis player. Noong Hunyo 2024, tinanghal siyang Asia Pacific Padel Tour No. 1 matapos mag-runner-up sa Bali Open kasama si Maria Mayoral Estrada ng Spain.
Ang padel ay isang racket sport na pinagsamang tennis at squash, karaniwang nilalaro sa doubles sa loob ng enclosed court na napapalibutan ng salamin at metal mesh.
Tunay ngang tagumpay ang bagong ranggo ni Jessica Agra—isang Pinay na abogado, atleta, at inspirasyon sa padel court. (RON TOLENTINO)
More Stories
QC Todo na sa Kalikasan! Fashion Show, Tree Giveaway at Plastic Ban, Tampok sa Earth Day 2025
REBELDE NA NANUNOG NG SIMBAHAN SA ILIGAN, ARETADO SA BUKIDNON
NBI, Mag-iimbestiga sa Umano’y Troll Farm ng China sa Pilipinas