Miru election contract kinuwestiyon sa SC

Nagsampa ng petisyon ang grupo ng civil society organizations sa Korte Suprema upang obligahin ang Commission on Elections at ang Miru Systems Co. Ltd. na ganap na ilabas ang mga pangunahing dokumento kaugnay ng kontrata para sa halalan sa Mayo.

Ayon sa Right to Know, Right Now Coalition (R2KRN) at co-petitioner nito, na kinabibilangan ng mga lingkod-bayan, mga manggagawang migrante, mga tagapagtaguyod ng kapaligiran, mga unyon ng manggagawa, mga tagapagtanggol ng karapatang pantao, at mga independiyenteng organisasyon ng media, mahalaga ang transparency upang mapanatili ang tiwala ng publiko sa electoral system.

Itinuturing nila ang kanilang petisyon bilang isang makasaysayang hakbang sa batas dahil layunin nitong patunayan na ang karapatang konstitusyonal sa impormasyon ay maaaring ipatupad hindi lamang laban sa mga ahensya ng gobyerno kundi pati na rin sa mga pribadong entidad kapag sila ay nagsasagawa ng mahahalagang pampublikong tungkulin, tulad ng pamamahala sa automated na halalan ng bansa.

Ang petisyon ay kasunod ng lumalalang mga alalahanin tungkol sa pag-atras ng St. Timothy Construction Corporation, isang pangunahing kasosyo ng Miru sa Pilipinas, na nag-secure ng pondo para sa joint venture.

Ang pag-atras ni St. Timothy ay nagdudulot ng mga katanungan tungkol sa pinansyal na kakayahan ng mga natitirang kasosyo at kung kaya ba nilang ganap na matugunan ang kanilang mga kontraktwal na obligasyon sa Comelec.

Nangangamba ang R2KRN na maaring kulangin na sa kinakailangang pondo ang pinagsamang proyekto, na naglalagay sa panganib ng tagumpay ng halalan sa Mayo 12.

Noong Marso 11, 2024, pumirma ang Comelec ng isang P18-bilyong kontrata sa isang joint venture na binubuo ng Miru Inc. at STCC upang ipatupad ang automated election system para sa 2025. Subalit, noong Oktubre 4, 2024, inanunsyo ng Comelec na ang STCC ay nag-withdraw mula sa partnership.

“We asked Comelec and Miru to provide us with an updated joint venture agreement that includes the current composition of the Miru joint venture, the detailed allocation of the remaining partner’s financial, technical, and operational contributions, or any applicable contributions of money, property, or industry, along with their monetary valuation and the resulting percentage interest of each remaining partner,” ayon sa R2KRN.

Hiniling din ng coalition sa Comelec at Miru na kumpirmahin kung ang performance bond na isinumite ng Miru ay nananatiling valid at maaaring i-call on demand kahit na nag-withdraw na ang STCC. Binigyang-diin ni Malaluan ang pangangailangan para sa transparency at accountability sa mga pampublikong kontrata, lalo na sa mga may kaugnayan sa integridad ng halalan.

Pinapalakas ng petisyon ang mga alalahanin hinggil sa epekto ng mga pagbabago sa joint venture sa pagsunod sa mga batas ukol sa pagmamay-ari ng Filipino at sa pangkalahatang pagpapatupad ng automated election system.

Hanggang ngayon, hindi pa tumugon ang Comelec sa petisyon, habang nanatiling tahimik din ang Miru Systems. Habang papalapit ang halalan sa 2025, patuloy na pinapalakas ng mga tagapagtaguyod ng transparency ang kanilang panawagan para sa pagbubukas ng mga detalye at pananagutan sa mga proseso ng gobyerno sa pagkuha ng kontrata.