382 DEBOTO NG ITIM NA NAZARENO, NATULUNGAN NG PRC (Nagtamo ng minor at major injuries)

Umabot sa 382 deboto na nakiisa sa Pista ng Itim na Nazareno kanina ang narespondehan at natulungan ng Philippine Red Cross (PRC).

Bandang alas-11:00 kaninang umaga, kaubuang 382 na ang mga pasyente na narespondehan ng PRC.

Sa bilang na ito, sinuri ng PRC ang vital signs ng 155 indibidwal. Nakapagtala rin ng 135 minor cases at limang major cases.

Sa mga inilipat sa PRC Emergency Field Hospital, ilan sa mga iniinda ng mga deboto ay ang lagnat, ubo, pagkahilo, panghihina, pagsusuka, ankle sprain, chest pain at pamamanhid.

Pananakit ng tiyan naman ang ininda ng isang buntis na agad dinala sa isang medical facility.

Ayon sa PRC, nasa 10 First Aid Stations; 8 welfare desks at isang Emergency Field Hospital ang kanilang itinalaga para sa Traslacion.

Nagpakilos rin ito ng 319 indibidwal at 13 ambulasya, fire truck at rescue boat na naka-standby.

Posibleng madagdagan pa ang bilang ng injuries at mangangailangan ng atensyong medikal habang hindi pa natatapos ang prusisyon na inaasahang lalahukan ng milyong deboto.