2 wanted na kriminal, nasilo sa Navotas

ARESTADO ang dalawang wanted persons na kapwa akusado sa kasong murder, kabilang ang leader ng isang notoryus criminal group sa magkahiwalay na manhunt operation ng pulisya sa Navotas City.

Sa ulat ni Navotas police chief P/Col. Mario Cortes kay P/BGen. Josefino Ligan, Acting District Director ng Northern Police District (NPD), ikinasa nila ang pagtugis sa dalawang murder suspek.

Unang nakorner ng mga operatiba ng Warrant and Subpoen Section ng NCPS ang 56-anyos na construction worker na residente ng Bulacan sa Kanduli St., Brgy., NBBS Dagat-Dagatan dakong alas-5:25 ng hapon.

Ang akusado na nakatala bilang Top 4 Most Wanted Person sa NPD at Top 2 MWP (Station level) ay dinakip sa bisa ng warrant of arrest para sa kasongf Murder na inisyu ni Presiding Judge Celso R. L. Magsino, Jr., RTC Branch 74, Malabon City, noong March 17, 2025.

Ayon kay Col. Cortes, sunod na natimbog ng mga operatiba ng Intelligence Section bandang alas-6:05 ng gabi sa kanyang bahay sa Brgy. Daang Hari ang 32-anyos na akusado na lider umano ng isang notoryus criminal gang.

Binitbit ang akusado sa bisa ng arrest warrant na inisyu ng Regional Trial Court (RTC) ng Navotas City para sa kasong murder case (Article 248 of the Revised Penal Code).

Walang inirekomendang piyansa ang korte para sa pansamantalang paglaya ng mga akusado na kapwa ipiniit muna sa custodial facility unit ng Navotas police habang hinihintay ang pagpapalabas ng commitment order mula sa hukuman.

Ani BGen. Ligan, ang pagkakaaresto sa mga akusado ay bahagi ng pangako ng Northern Police District sa paghahatid ng hustisya at pagpapanatili ng kaligtasan ng publiko.