2 rapist, nadakip sa Caloocan at Valenzuela

BINALIBAG sa selda ang dalawang rapist na kabilang sa mga Most Wanted Persons (MWP) sa Caloocan at Valenzuela Cities matapos masakote ng pulisya sa magkahiwalay na manhunt operation.

Sa ulat, unang nadakip ang lalaking nahaharap sa dalawang bilang na kasong panggagahasa dakong alas-11:25 ng gabi sa Diamante St. Brgy 170, matapos siyang matunton ng mga tauhan ng Warrant and Subpoena Section (WSS).

Nabatid na pang-anim sa tinaguriang MWP ang nadakip na akusado sa bisa na rin ng warrant of arrest.

Dakong alas-8:00 ng umaga nang isilbi naman ng mga tauhan ng Valenzuela Police Warrant and Subpoena Section, ang warrant of arrest para sa anim na bilang na Statutory Rape in relation to RA.7610 o ang Special Protection of Children Against Abuse, Exploitation and Discrimination Act.

Isinilbi ang arrest warrant sa akusado sa loob ng custodial facility ng Valenzuela CPS matapos unang mahuli ang akusado sa hindi nabanggit na kaso.