2 bata nagasaan ng taxi sa Caloocan, 1 patay, 1 sugatan

UTAS ang 5-anyos na batang lalaki habang malubha naman ang kanyang pinsan matapos masagasaan ng taxi habang nakaupo ang mga biktima sa gilid ng kalsada sa Caloocan City.

Binawian ng buhay habang ginagamot sa Dr Jose N Rodriguez Memorial Hospital sanhi ng tinamong mga sugat sa katawan ang biktimang si alyas “Isma”, 5, samantalang nakaratay naman sa nasabing pagamutan si alyas “JC”, 6, kapwa ng Catleya St., Barrio San Jose, Brgy. 187 ng lungsod.

Nahaharap naman sa kasong Reckless Imprudence Resulting in Homicide and Physical Injury ang driver ng taxi na si Christopher Cacho, 47, at residente ng Block 21, Lot 38, NHA Phase 6A Graceville, San Jose Del Monte, Bulacan.

Lumabas sa imbestigasyon ni PSSg Dennis Michael Natividad, dakong alas-3:00 ng hapon nang maganap ang insidente sa kahabaan ng Dalia St., Brgy., 187 ng lungsod.

Sa inisyal na ulat, tinatahak ng naturang taxi na minamaneho ni Cacho ang kahabaan ng nasabing lugar patungong Catleya nang mahagip at masagasaan nito ang mga biktima na nakaupo at naglalaro umano sa gilid ng kalsada.

Kaagad isinugod ng kanilang mga kaanak ang mga biktima sa nasabing pagamutan subalit, ideneklarang patay ang isa sa kanila habang nadakip naman ng pulisya ang driver ng taxi.