Ibinunyag ni President-elect Ferdinand “Bongbong” Marcos Jr. ang iba pang bubuo sa kanyang gabinete.
Sa press conference nitong Huwebes, inihayag ni Marcos Jr. na uupong kalihim ng Department of Finance (DOF) si Bangko Sentral ng Pilipinas Governor Benjamin Diokno.
Papalit naman kay Diokno sa BSP si incumbent Monetary Board member Felipe Medalla, na dating nagsilbi bilang Socioeconomic Planning Secretary ni dating Pangulong Joseph Estrada.
Inalok naman ni Marcos Jr. na maging kalihim ng Department of Public Works and Highways (DPWH) si Manuel “Manny” Bonoan, ang chief executive officer of San Miguel Corp Tollways.
“I’m intending to nominate Manny Bonoan for the [Department] of Public Works and Highways,” wika ni Marcos, Jr. sa press briefing sa mga piling media outfits.
“He has spent almost his entire professional life in the DPWH. I know him very well so I think he will do… I know he will do a good job. Those are the things we have decided,” dagdag pa niya.
Kinuha naman ni Marcos para magsilbing Trade Secretary si dating University of the Philippines president Alfredo Pascual. Si Pascual ay kasalukuyang presidente ng Management Association of the Philippines.
“I’ve asked Fred Pascual to head the DTI and he has agreed,” sambit ni Marcos Jr.